VIGAN CITY – Kaso a panaglabsing ti Presidential Decree 1602 ti sangwen dagiti tallo a nakemmeg a nagsusugal idiay Brgy. Laslasong, Sta. Maria babaen iti naiwayat nga anti-illegal gambling operation.
Nabigbig dagiti suspek a da Donald Calera, agtawen ti limapulo ket lima, retirado a pulis; Jose Castro, agtawen ti pitopulo ket tallo, mannalon; ken ni Rodel Rambianga, konduktor nga agpapada nga agnaed iti nasao a lugar.
Segun ken ni Police Captain Regin Cabico, hepe ti Sta. Maria Police Station, napakaammuanda nga adda ti agsusugal iti nasao a lugar isu a nangiwayatda ti operasyon ket naaktuanda nga agsusugal dagiti suspek iti tong-it a rason ti pannakakemmegda.
Naala kadakuada ti maysa a set ti baraha ken pusta nga aggatad ti tallogasut siam a pulo a pisos ket addadan iti kustodiya ti Sta. Maria PNP tapno dumalanda iti usto a proseso ken no pay kasta adda iti PHP 15, 500 a naiyetnag a pagpiansa dagiti suspek para iti pannakawayawayada.
