VIGAN CITY – Sumango iti kaso a panaglabsing iti Presidential Decree 1602 wenno ti Anti-Illegal Gambling Act dagiti tallo a natiliwan a nagsusugal idiay Barangay Poblacion, Banayoyo.
Nabigbig dagiti suspek a da Luzviminda Manzano, agtawen iti innem a pulo ket pito; Tina Gagno, agtawen iti limapulo ket pito; ken ni Niño Gagno, agtawen iti duapulo ket walo nga agpapada a residente iti nasao a lugar.
Nagresponde dagiti kameng ti Banayoyo Police Station iti lugar a nagsusugalan dagiti suspek ket naaktuanda ti dua a babai ken maysa a lalaki nga agtotong-its.
Naala kadakuada ti maysa a set ti braha ken sangagasut tallopulo ket lima a pisos.
Naipan dagiti suspek iti Candon General Hospital, Candon City para iti medical examination sakbay a nayakarda idiay Banayoyo Police Station tapno dumalanda iti husto a proseso.
