VIGAN CITY – Sumango iti kaso a panaglabsing iti Presidential Decree 1602 dagiti tallo a nagsusugal iti San Pedro, Norte, Vigan City a nakemmeg iti naiwayat nga anti-illegal gambling operation.
Nabigbig dagiti suspek a da Eric Tamayo Fernando, agtawen ti uppat a pulo ket lima, Sosimo Velasco Puruganan, agtawen ti innem a pulo ken ni Krypton Rosario King, agtawen ti tallopulo ket tallo nga agpapada nga agnaed iti nasao a lugar ken naaktuan a nagaayam iti “Tong its”.
Naala kadakuada ti maysa a glass table, set ti baraha, tallo a pagtugawan ken pusta nga aggatad ti sangaribo pitogasut limapulo a pisos.
Naipan iti Vigan City Health Office dagiti suspek para iti medical examination ken addadan iti kustodiya ti Vigan City Police Station tapno dumalanda iti usto a proseso.
