VIGAN CITY – Tallo ti nakemmeg iti naiwayat nga anti-illegal gambling operation idiay Sitio Carrot Zone 5, Brgy. Suso, Sta. Maria.
Iti pannaki-uman ti Bombo Radyo Vigan kenni PLt. Joel Dasargo, OIC iti Sta. Maria Police Station nakaawatda ti report manipud ti concern citizen nga adda iti nagsusugal iti nasao a lugar isu a nagrespondeda ket naaktuanda iti aramidda.
Segun kenni Dasargo, pinasingkedan dagiti nakemmeg nga adda iti pasken iti nasao a lugar ket pagpalabasan da laeng ti oras iti panagay-ayamda.
Nabigbig dagiti suspek a da Evengilyn Derige, agtawen ti innem a pulo ket uppat, maysa a retirado ti LGU employee, Milagros Oliveros, agtawen ti innem a pulo ket maysa, awanan ti asawa ken ni Rosita Villegas, agtawen ti uppat a pulo ket walo , housewife nga agpapada nga agnanaed iti nasao a barangay.
Naala kadakuada ti 44 a pidaso ti baraha, tallo a plastic mono block a tugaw, maysa a kayo a lamisaan ken pusta nga aggatad ti duagasut walopulo a pisos.
Iti agdama, addan iti kustodiya dagiti pannakabagi ti linteg dagiti natiliw tapno dumalan ti husto a proseso.
