VIGAN CITY – Tallo a tattao iti nakemmeg idinto maysa iti nakalibas ti naisayangkat nga Anti-illegal gambling operation ti Sta.Cruz Municipal Police Station idiay Brgy. Casilagan, Sta. Cruz, Ilocos Sur.
Nabigbig dagiti suspek a da Alvin Jomar Quitoriano Miaco, agtawen iti tallopulo ket dua; Mark Ulysses Flores Pascual, agtawen iti duapulo ket walo; Percival Damilig Lacanaria, agtawen iti pitopulo ket siyam, agpapada a residente ti nasao a barangay.
Iti pannaki-uman ti Bombo Radyo Vigan ken ni Police Captain Vinsent Tadeo, hepe ti Sta.Cruz Municipal Police Station, nakaawat iti tawag ti tactical operations manipud concerned citizen itay alas dose ti parbangon mainaig ti mapaspasamak a sugal.
Inpa-validate da nga umuna ti Sta.Cruz Police Station kadagiti Barangay Officials, ket idi maamuan da a positibo, nangbukelda iti team a mangkemmeg kadagiti agsusugal.
Naaktuan dagiti suspek nga nga agay-ayam ti “PUSOY DOS” a nakakumpiskaranda ti maysa a set ti baraha, Php 2,450 a pusta, lamisaan, ken uppat a piraso a tugaw.
Segun ken ni Police Captain Tadeo, likod iti natayan iti nakapasamakan ti sugal, ken kanayon a palpalagipan dagiti barangay officials dagiti agsusugal ngem natangken iti uloda.
Kabayatanna, isunga natured ti nakem dagiti agsusugal ta adda agwar-waras a fake news nga adda it-ited ti Sta.Cruz Municipal Police Station a permit tapno mapalubosanda nga agsugal.
Video – Police Captain Vinsent Tadeo
