VIGAN CITY – Panaglabsing iti Presidential Decree 1602 wenno Anti-Illegal Gambling Act ti sangwen a kaso dagiti tallo a nakemmeg a nagsusugal idiay Brgy Villamar, Caoayan.
Nabigbig dagiti suspek a da Arlene Quindag, agtawen iti uppat a pulo; Antonio Llanes, agtawen iti innem a pulo ket tallo ken ni Erwin Soberano, agtawen iti uppat a pulo ket walo nga agpapada a mangngalap ken agnaed iti nasao a lugar.
Segun ken ni P/ Maj. Henry Garcia, sibilian a lugan ti naglugananda a nagresponde ket idi nakasangpetda iti ayan dagiti agsusugal ket saanen a nakatarayen dagiti suspek a puon ti nakakemmeganda.
Naala kadakuada ti maysa a set ti baraha ken PHP623 a pusta nga itan ket nakakustodian kadagiti pannakabagi ti linteg pakairamanan dagiti suspek tapno maidalan iti husto a proseso.
