VIGAN CITY – Panaglabsing iti Presidential Decree 1602 wenno Anti Illegal Gambling Act ti sangwen a kaso dagiti tallo a nagsusugal a natiliw idiay Brgy. Las-ud, Sta. Cruz.
Nabigbig dagiti suspek a da Cesar Bernal, agtawen iti innem a pulo; Christopher Bernal, agtawen iti uppat a pulo ket uppat nga agpada a taga-Brgy. Las-ud ken ni Benigno Valdez, agtawen iti limapulo ket siam a taga-Brgy. Suyo.
Iti pannaki-uman ti Bombo Radyo Vigan ken ni PLt. Daniel Alviar, Officer-in-charge ti Sta. Cruz Police Station, napakaammoanda nga adda agsusugal iti asideg ti pagtaengan ni Ceasr Benard isu a nagrespondeda ket naaktuan nga agtotong-its dagiti suspek a naalaan iti maysa a set ti baraha ken pusta a PHP265.
Nakakustodian ita iti Sta Cruz Police Station dagiti suspek pakairamanan dagiti ebidensya a naala kadakuada tapno maidalan iti husto a proseso.
Nupay kasta, nagballaag ni Alviar kadagiti agindeg nga iasardengdan dagiti iligal nga aramidda ta agtultuloy ti operasyon ti kapulisan.
