Natiliw dagiti nagsusugal idiay Barangay Orence, Narvacan kas pinasingkedan ni Police Captain Arcadio Viloria a hepe ti Narvacan Municipal Police Station.
Segun kenni Viloria, nakaawatda iti report nga adda iti inaldaw nga agsusugal isu a nangisayangkat iti operasyon ket natakuatanda nga aga-ayam iti Pusoy dos iti ruar iti pagtaengan ni Agrepina Ramos da Calvin Collo, agtawen ti dua pulo ket uppat, baro, awanan trabaho; Rowena Cabarloc, agtawen ti uppat a pulo ket uppat, naasawaan ken ni Karen Joy Supnet, agtawen ti dua pulo ket dua, baro, awanan trabaho nga agpapada nga agnaed iti nasao a lugar.
Naala kadagiti suspek iti maysa a set iti baraha, uppat a tugaw, maysa a lamisaan ken pusta nga innem a gasut pito pulo ket tallo a pisos.
Kabayatanna, maysa a suspek iti nakalibas nga isu ni Manuel Supnet, agtawen ti innem a pulo ket siam, naasawaan, mannalon nga agnaed met laeng iti nasao a lugar.
