VIGAN CITY – Dead on arrival iti ospital dagiti tallo a naglugan iti maysa a traysikel idiay Brgy. Basug, Santa gapu iti aksidente a nakairamanan ti maysa a trak, traysikel ken motorsiklo.
Nabigbig dagiti natay a biktima a da Jonathan Aquino, agtawen ti limapulo nga agnaed iti Mabilbila Sur, Santa nga isu ti nagmaneho iti traysikel; Graciella Lyka Aquino, agtawen ti duapulo a putot ti nagmaneho; ken ti gayyemna a ni Lovelle Anne Tadeja, agtawen ti duapulo nga agnaed iti Brgy. Basug.
Kabayatanna, nabigbig met ti nagmaneho ti motorsiklo a ni Alyssa De Peralta, agtawen ti sangapulo ket siam nga agnaed iti Brgy. Sacuyya Norte a nadunor met laeng idinto a ti nagmaneho ti trak ket ni Nerwin Echnique, agtawen ti uppat a pulo ket siam nga agnaed iti Batac, Ilocos Norte.
Sarsarunwen ti motorsiklo ti traysikel agingga idi nadungparna ket naipan iti bangir a linya ti traysikel idinto ta adda ti nakasinnabetda a trak a nakadungpar kaniada a puon ti nakatayanda.
No pay kasta, addan iti kustodiya dagiti kameng ti linteg ti drayber ti trak tapno dumalan iti usto a proseso.
