VIGAN CITY – Dunor ti ulo iti sinagaba ni Richard Garcia Rebibis, agtawen iti duapulo, nga agnaed idiay Barangay Barbarit Magsingal ta naaksidente bayat ti panagmotorsiklona idiay Barangay Road, San Ramon, Magsingal idinto a gasgas iti nadumaduma a paset ti bagi ti sinagaba ti dua nga inluganna a nakairamanan ti maysa a menor de edad.
Iti pannaki-uman ti Bombo Radyo Vigan ken ni Patrolman Jaypee De Jesus nga Investigator-on-case iti Magsingal Municipal Police Station, patienda a liniklikan dagiti nagkakalugan ti motorsiklo iti checkpoint nga isaysayangkat dagiti otoridad isu a nagnada idiay San Ramon, Magsingal.
Segun kenkuana, agpapada a nakainom iti arak ken saan a nakahelmet dagiti nagkakalugan idi napasamak iti aksidente ta naawanan ti kontrol ti manibela ti driver ti motorsiklo.
Gapu ti sinagabada a dunor ket naipanda iti Ilocos Sur District Hospital-Magsingal babaen kadagiti nagreponde a kameng ti Philippine National Police ken Bureau of Fire Protection.
Nupay kasta, saan met unay a nakaru iti naapektaran a paset ti motorsiklo ta nagasgasan laeng ngem iti agdama ket adda iti kustodiya iti pannakabagi ti linteg.
VIDEO – PATROLMAN JAYPEE DE JESUS
