Nagsagaba iti minor injuries dagiti tallo a nagkakalubbon iti motorsiklo gapu iti panagdinnungpar ti luganda ken ti maysa a bus iti national highway idiay Barangay Las-ud, Tagudin, Ilocos Sur.
Nabigbig ti nagmaneho iti Honda Click 125 motorcycle a ni Gerome Paz Lorenzana, kinalubbonna da Eurique Gabriel David, ken ni Christopher Tapño Collado Jr., agpapada nga agtawen iti sangapulo ket siam ken agnaed iti Barangay Magsaysay, Tagudin.
Ti met nagmaneho iti Partas Bus ket ni Jaypee Ascaño Camaddo, agtawen iti uppat a pulo ket maysa, taga-Barangay Pong-ol, Vigan City.
Aggapu iti agsinnumbangir a linya ti kalsada dagiti dua a lugan, ket idi magtengda ti nakapasamakan ti insidente kangrunaan iti kurbada a paset ti kalsada, inagaw ti motorsiklo ti linya ti bus isu a nagdinnungparda.
Gapu dayta, naidarusdos dagiti nagkakalubbon iti kalsada ken nadunor ti nadumaduma a paset ti bagida isu a naipaagasda iti ospital para iti pannakatamingda.
Nakainom dagiti naglugan iti motorsiklo ken awan ti suotda a helmet idi mapasamak ti aksidente.
