VIGAN CITY – Nadundunor dagiti tallo a nagkakalubbon ti motorsiklo gapu iti pannakaaksidenteda iti national highway idiay Brgy. Nanguneg East, Narvacan, Ilocos Sur.
Segun ti Narvacan Municipal Police Station, ti nagmaneho iti motorstar 125 a motorsiklo ket ni Angel Fabro Dagdagan, agtawen ti duapulo ket dua nga agnaed idiat Brgy. Agagrao, Sta. Maria; ken dagiti kinalubbonna a da Manolito Calibuso, agtawen ti duapulo ket maysa a taga-Brgy. Suso, Sta. Maria ken Jayson Ganadu, agtawen ti duapulo ket uppat nga agnaed idiay Brgy. Tablac, Candon City nga agpapada a construction worker.
Agpapabagatan a direksyon ti motorsiklo idin naawanan ti kontrol ti manibela ti driver a gappuanan ti pannakaidungparda iti kongkreto a poste iti kuryente ket natumbada.
Gapu ti sinagabada a dunor ket agpapadada a naipan ti Ilocos Sur district Narvacan para iti panagpaagasda idinto a saan pay nga ammo nu mano ti gatad ti nadadael a paset ti lugan.
