VIGAN CITY – Tallo iti nakemmeg pakairamanan ti dua a senior citizen iti naisayangkat nga Anti-Illegal Gambling Operation idiay Puroc 4, Brgy. Pantay Laud, Vigan City.
Nabigbig dagiti suspek a da Jacel Ablog Ragasa, agtawen ti uppat a pulo ket dua; Edgar Rabara Ramolete, agtawen ti innem a pulo ket dua, naasawaan, mannalon nga agpada nga agnaed idiay Pantay Laud, Vigan City ken ni Cecilio Maris Cotios Rafanan, agtawen ti innem a pulo ket innem, naasawaan, driver nga agnaed idiay Zone 4, Bantay.
Babaen ti panagtitinulong dagiti pannakabagi ti linteg, naisayangkat iti anti-illegal gambling operation iti nasao a lugar ket naaktuan ti panaggaay-ayam dagiti suspek ti tong-its.
Naala kadakuada iti maysa a plastic a lamisaan, tallo a piraso iti plastic a tugaw, maysa a set iti baraha ken pusta nga aggatad iti P1,510.
Iti agdama, addan ti kustodiya iti Vigan City Police Station dagiti suspek tapno dumalan ti husto a proseso.
