VIGAN CITY – Kaso a panaglabsing iti Presidential Decree 1602 wenno ti Anti Illegal Gambling Law ti sangwen dagiti tallo a nagaayam ti bilyar idiay Cacadiran, Cabugao a nakemmeg babaen iti naiwayat nga operasyon.
Nabigbig dagiti suspek a ni Benjie Valles, agtawen ti tallopulo ket tallo, tricycle driver nga agnaed idiay Namruangan; Joemar Ventura, agtawen ti tallopulo ket innem nga agnaed idiay Malammin, San Juan ken ti akinkukua ti bilyaran a ni Ian Tacpal, agtawen ti duapulo ket innem nga agnaed idiay Brgy. Cacadiran nga agpapada a naaktuan iti iligal nga aramidda.
Naala kadakuada ti maysa a billiard table, maysa a set ti billiard balls, dua a cue stick, maysa a triangle rack ken ti pusta nga aggatad iti sangaribo sangagasut sangapulo ket walo a pisos.
Nakakustodiyan dagiti suspek iti Cabugao Municipal Police Station tapno dumalanda iti usto a proseso.
