VIGAN CITY – Tallo a nagsusugal ti nakemmeg iti naiwayat nga Anti-Illegal Gambling operation idiay Barangay San Isidro, San Juan.
Nabigbig dagiti suspek a da Abegail Benitez, agtawen iti tallopulo ket lima; Barangay Kagawad Zeny Palma, agtawen iti limapulo ket walo; ken ni Isabelina Del Rosario, agtawen iti innem a pulo ket dua nga agpapada nga agnaed iti nasao a lugar ken naaktuan a nagaayam iti tong-its ken naala kadakuada ti braha ken pusta a PHP1,500.
Iti pannaki-uman ti Bombo Radyo Vigan ken ni PMaj. Christopher Ramat, mangidaulo iti San Juan Municipal Police Station, nainget ti panangipatungpatungpalda kadagiti anti-gambling operation ken dadduma pay nga operasyon kontra kadagiti iligal nga aramid ngem adu latta dagiti sukir nga isu ti agtultuloy a balballaaganda.
Nupay kasta, naipan dagiti suspek iti San Juan Municipal Police Station ken dagiti ebidensya a naala tapno maidalan iti husto a proseso.
Kabayatanna, nakapyansan dagiti natiliwan met laeng a nagsusugal idi Sabado a da Angelita Yagui Pizarro, agtawen iti innem a pulo ket tallo, STL collector a taga-Barangay Pandayan; Reynalda Viloria Sagun, agtawen iti limapulo ket siam a taga-Barangay Sungjam ken ni Blanca Tugas Sanchez, agtawen iti uppat a pulo ket walo a taga-Barangay Cabanglutan.
