VIGAN CITY – Awan iti nadangran iti panagtitinnukbob dagiti tallo a lugan idiay national highway ti Bungro, Magsingal idi alas dyes y media iti agsapa idi July 1.
Maibasar iti inisyal nga imbestigasyon, agpapa-abagatan a direksyon ti Toyota Fortuner a minaneho ni Michel Regpala Yadao nga agtawen iti dua pulo ket maysa a taga- Sabangan, San Juan idi nagsardeng ket aksidente a natukbob ti sumar-saruno nga Isuzu Elf a minaneho ni Dexter Solis Roces nga agtawen iti dua pulo ket walo, naasawaan ken agnaed idiay Mapandan, Pangasinan.
Ti likudan met ti Isuzu elf ket aksidente a natukbob iti sumar-saruno a Suzuki Rider motorcycle a minaneho ni Don. Erwin Gerald Sebastian Simbre nga agtawen iti sangapulo ket walo, baro ken agnaed idiay Barangay Arnap, Cabugao.
Mainaig dayta, inbalakad met dagiti otoridad nga agridam dagiti agmanmaneho ti lugan nu adda da iti kalsada tapnu saan da a maaksidente.
