VIGAN CITY – Tallo a lugan a pakairamanan ti dua a motorsiklo ken maysa a pick up ti karaman iti aksidente idiay Barangay Resurrecion, San Juan.
Dagiti lugan a karaman ket ti Honda Beat motorcycle a minaneho ni Remedios Nicolas, agtawen iti limapulo ket siam a taga-Barangay Bacsil, San Juan; NMAX motorcycle a minaneho ni Jan Micheal Alejandro, agtawen iti duapulo ket siam, mekaniko, taga-Poblacion Sur, Sta. Maria, rider participant iti Endurance Challenge; ken ti Chevrolett Colorado pick up a minaneho ni Julious Nalundasan, agtawen iti tallopulo ket uppat, engineer, a residente iti Tala, Caloocan City.
Agpapa-amianan a direksyon ti Honda Beat idin ta agsikko iti kannigid ket nadungpar iti sumarsaruno kenkuana nga NMAX isu a naipurwak ti drayber ti Honda beat iti south lane a nakadungparan kenkuana iti sumungsungad a pick up.
Naipaagas ti drayber ti Honda Beat idiay Pira Hospital, Cabugao para ti pannakatamingna, idinto a ti drayber ti NMAX ken pick up ket saan a naan-ano.
