VIGAN CITY – Atapen ni Police Lt. Col. David Dulnuan, hepe ti Candon City police station, nga adda pay iti sabali a kakadua dagiti tallo a lallaki a nakemmeg da a konektado iti panagtakawan iti nasao a syudad.
Mainaig dayta, manarimaanen iti naun-uneg nga imbestigasyon ti Candon City PNP kadagiti posible a kakadua dagiti suspek a da Fernan Bacaycay nga agtawen ti dua pulo ket tallo, baro a tubo ti Ibuhan, San Mariano, Isabela; Jayson Taccaban nga agtawen ti tallo pulo, baro a tubo ti Paracale, Malagit, Camartines Norte kenni Percival Jamili Novicio nga agtawen ti dua pulo ket pito, baro a tubo ti Mansilingen, Bacolod City, Negros Occidental nga agpapada nga agab-abang iti pagtaengan idiay Barangay San Nicolas, Candon City.
Nakemmeg dagiti tallo idi nagresponde dagiti otoridad iti gandat da a panangserrek ken panagtakaw kuma iti uneg iti pagtaengan ni Rey Lozano Manza nga agtawen ti tallo pulo ket innem, naasawaan, maysa nga empleyado iti gobiyerno nga agnanaed idiay Pag-ibig Subdivision, Bagani Ubbog, Candon City.
Idi naipan iti istasyon ti Candon City PNP dagiti suspek, naala kadakuada dagiti naduma-duma nga ID, cellphone ken ATM nga immun-unan a tinakaw da iti pagdagdagusan ni Raymund Rabino nga agtawen ti tallo pulo ket dua, naasawaan, credit supervisor a tubo ti Poblacion, Sta. Catalina idiay Victoria Building, Barangay San Nicolas, Candon City idi rabii ti September 29.
Agsipud iti dayta, kaso a robbery ken attempted robbery iti naipila kontra kadagiti suspek, sabalin to laeng ti kaso a maipila kontra kadakuada babaen kadagiti dua pay a nabiktima da a napan iti istasyon ti pulisya.
Pinasingkedan ti hepe a nu ti aldaw, dagiti suspek ket aglaklako da iti naduma-duma nga streetfoods nga isu iti posible a rason nu apay a makapasyar da ken masirpatan da dagiti pagtaengan a serreken ken takawan da.
Innayon na pay a maysa kadagiti suspek iti ginandat na iti aglibas idi kemmegen idan dagiti nagresponde nga otoridad ta timpuwak iti rangtay ngem nakemmeg met laeng ta limmung-aw kalpasan iti sumagmamano a minutos ta awan iti angin nga angsen na.
