Tallo ti nakemmeg iti napasamak a komosyon idiay Barangay Cabangtalan, Sinait, Ilocos Sur.
Nabigbig dagiti suspek a da Raymark Bacros Taclay, agtawen iti sangapulo ket walo; Jomarie Yadao Cariaga, agtawen iti duapulo ket maysa, agpada a taga-Barangay Turod, Badoc, Ilocos Norte ken ni Cyrus Sales Juan, agtawen iti sangapulo ket siam, taga-Barangay Labut, Badoc, Ilocos Norte.
Ti biktima ket ni Barangay Captain Richard Iniba Ibera, agtawen iti tallopulo ket maysa, taga-Barangay Cabangtalan, Sinait.
Nakaawat iti tawag ti Sinait Police Station manipud iti maysa a concerned citizen nga adda mapaspasamak a komosyon iti nasao a lugar.
Idi nakadanon dagiti PNP personnel, sumagmamano nga agindeg iti nasao a barangay, karaman ti Barangay Captain ken dadduma a barangay tanod ti mangkamkamat kadagiti tallo a lallaki nga agtartaray kadagita a gundaway.
Dagus a nangiwayat iti pursuit operation dagiti pannakabagi ti linteg ket bayat iti operasyon, maysa kadagiti suspek a ni Cariaga ti nakemmeg ngem bigla a nangasot iti kutsilyo a 4.5 cm ti kaakabana, ket inlayatna iti kapitan a nakadunoran iti akin-kannawan a baba ti tyanna.
Kinemmeg daytoy dagiti pannakabagi ti linteg pakairamanan dagiti dua pay a suspek.
Segun kadagiti witness, simmangpet dagiti suspek idiay Cabangtalan beach, kangrunaan kadagiti cottage a nakapasamakan iti komosyon.
