VIGAN CITY – Tallo ti nakemmeg gapu iti mauling incident a napasamak iti provincial road ti Nansuagao, Caoayan.
Nabigbig dagiti suspek a da Renzo Divina Bueno, agtawen iti sangapulo ket walo, ni Jhay M Aseron Cadaoas, agtawen iti duapulo ket maysa, agpada a taga-Barangay Don Dimas Querubin, Caoayan; ken ni Mark Patrick Garduque, taga-Barangay Anonang Mayor, Caoayan.
Ni Garduque ket datin nga adda ti rekordna mainaig met laeng iti mauling incident.
Iti pannaki-uman ti Bombo Radyo Vigan ken ni Police Captain Medel Perinion, immuna nga adda komprontasyon a napasamak iti grupo dagiti suspek ngem naanawa pay laeng iti dayta a gundaway.
Dumaldalyasat ti biktima iti provincial road ti Barangay Nansuagao a nakalugan iti motorsiklona nga agawid koman idin ket nadlawna a sursuroten isuna dagiti suspek a nakamotorsiklo ket pinasardengda ti biktima nga isu ti gundaway a panangbugbogda kenkuana.
Nagaramat pay dagiti suspek iti natangken a banag a pinangdangranda iti rupa ti biktima gapuanan ti nakatumbaanna sa naglibas met dagiti suspek.
Nagawid ti biktima a nagpatulong kadagiti miembro ti pamiliana ta daytoy ket nadunor ti akin-kannigid a paset ti mugingna ken akin kannigid a pingpingna.
Naipaagas iti ospital para iti pannakatamingna idinto a naiwayat ti hot pursuit operation a nakakemmegan dagiti suspek.
Maisagsagana metten ti kaso a physical injuries a sangwen dagiti suspek.
