--Ads--

VIGAN CITY – Tallo iti naaktoan nga ilegal a nagkalap iti kabaybayan a paset idiay Barangay Bateria, San Esteban, Ilocos Sur.

Segun ti San Esteban Police Station, dagiti ilegal a nagkalap ket da Marlon Diego, agtawen ti limapulo ket lima, naasawaan; Reynaldo Umipig Santiago, agtawen ti limapulo ket pito, naasawaan; ken Jeffrey Carpio Abucay, agtawen ti uppat a pulo ket tallo, naasawaan nga agpapada a mangngalap ken taga-Lingsat Sta. Maria.

Insayangkat dagiti kameng ti Bureau of Fisheries and Aquatic Resources, Philippine National Police Maritime a nakabase idiay San Esteban kaduada dagiti kameng ti Philippine Coast Guard iti seaborne patrol ti territorial water a masakupan iti San Esteban kangrunaan idiay Barangay Bateria ket naaktoan iti ilegal a panagkalapda ta nagaramatda iti compressor bayat ti kaaddada iti motorized bangka.

Dagiti nasao a nakemmeg ket naipanen iti Philippine Coast Guard Sub-Office, idiay Barangay Villa Quirino, San Esteban.

-- ADVERTISEMENT --

Naala kadakuada iti fishing paraphernalia pakairamanan ti maysa a unit iti compressor nga adda dua a naikonektar a hose nga umabot iti limapulo a metro iti tunggal maysa; dua a spearguns, dua nga eye goggles ken nasurok kumurang sangapulo a kilo iti agduduma nga ikan.