VIGAN CITY – Mapapati a miyembro ti gun-for-hire ken private armed group nga agdakdakiwas idiay probinsiya ti Abra dagiti tallo a lallaki a natay idi parbangon idi kalman ta liniklikan da iti checkpoint dagiti otoridad idiay Angad, Bangued, Abra kas pinasingkedan ni Police Col. Alfredo Dangani, provincial director ti Abra Police Provincial Office.
Dagiti natay ket isu da Michael Gonzales nga agtawen iti uppat a pulo, maysa a tricycle driver nga agnaed idiay Lubong, Bangued, Abra; Ariel Vazquez Isao nga agtawen iti dua pulo ket siyam a taga- Arab, Pidigan, Abra kenni Glenford Soria Agaid nga agtawen iti tallo pulo a taga- Namarabar, Peñarubia, Abra.
Segun ken ni Dangani, dagiti natay a suspek ket agpapada nga adda dagiti kaso a nakairamanan da iti kallabes kas ken ni Gonzales nga adda iti nadismiss a kaso na a panaglabsing ti Republic Act 9165 wennu Comprehensive Dangerous Drugs Act of 2002 idi August 25, 2018; ni Agaid ket adda idi kaso na a homicide idi 2008 kenni Isao a nakasoan idi ti panaglabsing ti Republic Act 10591 wennu Comprehensive Law on Firearms and Ammunitions idi November 20, 2018, frustrated murder idi 2005 ken malicious mischief.
Manipud idi nalpas iti eleksyon, umaboten iti sangapulo ket uppat nga insidente iti pammaltog iti napasamak idiay probinsiya ti Abra isu a nangiwayat dagiti otoridad iti 24-hours checkpoint kadagiti naduma-duma a lugar ket idi kalman, adda iti naawat da a kasla adda ti target dagiti suspek a patayen idiay Bangued, Abra.
Nu pay kasta, saan a namnamaen dagiti otoridad a nakalugan ti tricycle dagiti suspek iti gandat a pammapatay idiay Bangued agingga a nagkedked da iti checkpoint ket kinamat ida dagiti otoridad isu a napasamak iti engkuwentro a poon iti nakatayan dagiti tallo.
Maidalan to ti ballistic examination wennu cross matching dagiti dua a caliber 45 ken maysa a caliber 9 mm a naala dagiti otoridad iti uneg ti nagluganan dagiti suspek tapnu maamuan nu dagitoy ket naaramaten kadagiti insidente iti pammaltog idiay probinsiya ti Abra ken dadduma pay a krimen.
