VIGAN CITY – Tallo a lallaki iti nakemmeg gapu ti panagkukullangatda idiay Brgy. Sunggiam, San Juan, Ilocos Sur.
Nabigbig dagiti suspek a da Jasper Semana Villaspir, agtawen iti duapulo ket tallo, contruction worker; Aaron Semana Villaspir, agtawen iti duapulo ket lima, mekaniko; ken Joefred Paiste Raval, agtawen iti duapulo ket innem, naasawaan nga agpapada nga agnaed iti nasao a lugar.
Iti insayangkat nga anti-illegal cockfighting operation dagiti kameng ti San Juan Police Station, nakemmeg dagiti suspek a naaktuan ti panag-kukullangatda ket nagpupustada bayat ti kaaddada iti piggery farm ni Eris Palado idinto a ti dadduma a nagpusta ket nakalibas.
Naala kadakuada iti dua a sibibiag a kawitan ken pusta nga aggatad iti P13,300.
Naipan dagiti suspek iti kustodiya ti San Juan PNP pakairamanan dagiti naala kadakuada tapno dumalan ti husto a proseso.
