VIGAN CITY – Nakemmeg dagiti tallo a lallaki gapu iti panagikotda iti saggaysa a paltog idiay Brgy. Baclig, Cabugao, Ilocos Sur.
Iti pannaki-uman iti Bombo Radyo Vigan ken ni PMaj. Juan Jhayar Maggay, nakaawatda iti report nga adda iti aggi-inom nga adda ikotda a paltog iti igid iti karayan iti nasao a lugar isu a nagrespondeda a gappuanan iti pannakakemmeg da James Amias Savellano, agtawen iti uppat a pulo ket uppat, naasawaan nga agnaed idiay Brgy. Salomague, Cabugao; Joey Cabesa Ordillo, agtawen iti tallopulo ket innem nga agnaed idiay Brgy. Rizal, Cabugao ngem tubo iti Brgy. San Jose, Lal-lo, Cagayan; ken Roderick Quartero Gorospe, agtawen iti uppat a pulo nga agnaed idiay Brgy. Namruangan, Cabugao.
Segun ken ni Maggay, inrason dagiti suspek nga ikotda dagiti paltog kas armasda ngem nupay kasta ket kinunada nga awan iti karirida.
Naala kadakuada iti Cal 9mm a paltog nga addaan iti sangapulo ket innem a bala ken Cal 45 nga addaan iti sangapulo ket maysa a bala a naipanen iti Crime Laboratories tapno maidalan iti eksaminasyon nu naararamaten kadagiti pammaltog.
Kabayatanna, nakakustodiyan iti Cabugao Municipal Police Station dagiti suspek a mapilaan iti kaso a panaglabsing iti RA 10591 ken panaglabsing iti COMELEC Gun Ban.
