VIGAN CITY – Panaglabsing ti Presidential Decree 705 iti sangwen ti tallo a lallaki a nasalamaan gapu ti panangibiaheda iti saan a dokumentado a kayo idiay Brgy. Angkileng, Sta. Lucia.
Dagiti nakemmeg ket nabigbig a da Heyden Paet Pascua, agtawen ti limapulo, naasawaan, karpentero nga agnaed idiay San Pablo, San Esteban ngem tubo idiay Santa Margarita, Baggao, Cagayan; Joel Escalona Ellaga, agtawen ti uppat a pulo ket uppat, naasawaan, karpentero nga agnaed idiay Brgy. Alaludig, Santiago, Ilocos Sur; ken ni Eugene Gabuat Geron, agtawen ti tallopulo, naasawaan nga agnaed idiay Brgy. San Sebastian, San Vicente, Ilocos Sur.
Maibasar ti imbestigasyon, bayat ti panag-checkpoint dagiti kameng ti Sta. Lucia Police Station ket nasalamaanda ti maysa a puraw a Ssangyong MB100 nga adda linaonna a sangapulo ket uppat a piraso iti Mahogany ken dua a piraso ti Gmelina.
Awan ti aniaman a dokumento iti naipakita dagiti tallo para iti pannakaibiahe dagiti kayo isu a nakemmegda.
Iti agdama, addadan ti kustodiya iti Sta. Lucia Police Station para iti proper documentation ken disposition.
