VIGAN CITY -Tallo ti nakemmeg iti quarantine checkpoint idiay Brgy Tapao, Sinait gapu ti panangiparangda iti peke nga antigen test result ken sangwenda iti kaso a falsification of public documents.
Nabigbig dagiti suspek a da Rolly Valledor, agtawen iti duapulo ket siam, drayber a taga-Balulang Cagayan De Oro City, Misamis Oriental; Dante Rivero, agtawen iti uppat a pulo ket maysa, truck helper a taga-Bagong Bayan, Pequenio St. Goa Camarines Sur ken ni JC Vincent Olila Zorongon, agtawen iti duapulo ket pito, truck helper a taga-Brgy. Loong Concepcion, Iloilo City.
Mapan koma idiay Manila dagiti suspek a nakalugan iti Isuzu cargo wing van truck idin ta ininspeksion dagiti nakabantay iti checkpoint ket awan ti naiparangda a papeles ken kakaisuna a ti peke nga antigen test result nga awan resibona ken nakailanad iti resulta nga isuda ket negatibo.
Handwritten dagiti dadduman a papelesda a dagiti perma ti doktor ken medtech ket swinitik dagiti suspek isu a bineripika dagiti pannakabagi ti linteg dagiti papelesda babaen iti Doctors Polyclinic and Diagnostics, Talavera Nueva Ecija ket pinasingkedanda nga awan dagiti nagan ti suspek kadagiti nagbalin a pasyenteda.
