VIGAN CITY – Tallo a kaso a pakairamanan iti malicious mischief, direct assault, ken alarm and scandal ti sangwen da Freddie Escobar, agtawen iti limapulo ken ni Rommel Saldua, agtawen iti uppat a pulo ket pito a taga-Barangay Camarao, Narvacan gapu ti panagprobokar ken panangdangranda iti maysa a Barangay Tanod a ni Alfred Dasalla, agtawen iti tallopulo ket pito, agnaed iti nasao a lugar.
Bayat ti panag-duty ti biktima iti barangay control checkpoint iti waiting shed ti nasao a barangay, nabartek a simmangpet dagiti suspek a nagpukkaw iti napigsa ken induronda ti water dispenser a gapuanan ti pannakadadaelna.
Naipakaammo ti pasamak ken ni Barangay Kagawad Sherwin Blanco ngem idi makasangpet iti nakapasamakan ti insidente, prinobokar isuna dagiti suspek ken prinobokarda pay ti biktima a ni Dasalla.
Inanawa ti biktima ida ken impakaammona nga isu ket Barangay Tanod ngem dinangran isuna ti suspek.
Nadepensaran met ti biktima ti bagina babaen ti akin-kannigid a takyagna.
Naglibas dagiti suspek isu nga insigida a nangiwayat dagiti pannakabagi ti linteg iti hot pursuit operation a nagresulta iti pannakatiliwda kadagiti pagtaenganda.
