VIGAN CITY – Tallo a drug suspect ti nabuy-bust kadagiti tallo nga ili ditoy probinsia a pakairamanan ti Galimuyod, Santiago, ken Bantay.
Idiay Brgy. Legaspi, Galimuyod a nakemmeg ni Fredelson Alipda, agtawen iti limapulo ket maysa a taga-Bugnay, Candon City a kalaksidan ti panaglabsingna iti RA 9165 ket naglabsing pay iti RA10591 wenno ti iligal a panagikotna iti paltog.
Pinasingkedan ni P/Maj. Pol Areola nga idi napan a tawen ket nakemmeg ti suspek iti ili ti Candon ken iti met laeng ili a Galimuyod ngem bayat ti panangmonmonitorda ket nagtultuloy latta ti iligal nga aramidna.
Naala kenkuana ti maysa a heat sealed transparent plastic sachet ti shabu a nagserbi a buy bust item, maysa a small heat sealed transparent plastic sachet ti shabu nga ikot ti suspek nga agdagsen iti nasurok kumurang 0.4 gram nga aggatad iti PHP2,700 ken sangaribo a pisos a buy-bust money.
Sabali pay ti naala a dua nga ammunition ti caliber 45, drug paraphernalias, maysa a cellphone, motorsiklo ken PHP4680 a kuarta ti suspek.
Ni Reynante Dollente, agtawen iti tallopulo ket innem a taga-Brgy. Ambucao, Santiago, maysa met laeng a High Individual ket naalaan iti dua a small heat sealed transparent sachet ti shabu a nagserbi a buy bust item; nasurok kumurang maysa a gramo iti lima a heat sealed transparent plastic sachet ti shabu nga ikotna nga aggatad iti PHP6,800 pakairamanan ti dua a lima gasut a pisos a buy-bust money.
Kabayatanna, ni met Sanchez Tamo, agtawen iti uppat a pulo ket maysa, taga-Naguilian, Caoayan a nakemmeg idiay Zone 4, Bantay ket naalaan iti maysa a heat-sealed transparent plastic sachet ti shabu a nagserbi a buy-bust item ken sabali pay ti ikotna nga aggatad iti PHP2,000 pakairamanan ti sangaribo a pisos a buy-bust money.
Pinasingkedan ni PMaj. Juan Jhayr Maggay iti Bantay Police Station a ti suspek ket subject ti Caoayan PNP ngem immunada laeng a nakatiliw kenkuana gapu ti panagilakona iti shabu iti nasao nga ili.
