VIGAN CITY – Tallo a babbai iti nakemmeg idinto a maysa a kaduada iti nakalibas kalpasan iti panagsusugalda idiay Brgy. San Antonio, Narvacan, Ilocos Sur.
Nabigbig dagiti nakemmeg a da Maribelle Soria Ramirez, agtawen iti uppat a pulo ket maysa, balo; Jocelyn Molina Roldan, agtawen iti tallopulo ket uppat, naasawaan; ken Winchelle Pagaduan Cabiles, agtawen iti tallopulo ket maysa; idinto a ti nakalibas ket ni Angie Delos Santos Eduarte, agtawen iti uppat a pulo ket pito, naasawaan nga agpapada nga agnaed idiay Brgy. San Antonio, Narvacan.
Babaen iti panagtitinnulong dagiti pannakabagi ti linteg ket naisayangkat iti anti-illegal gambling operation iti nasao a lugar a gappuanan iti pannakakemmeg dagiti suspek idinto a bakalibas ti maysa a kaduada kalpasan a naaktoanda a nagay-ayam iti Mahjong nga adda pustana.
Naala kadakuada iti maysa a set iti mahjong, uppat a mono block a tugaw, maysa a kayo a lamisaan ken pusta nga aggatad iti P4,616.
Addan iti kustodiya iti Narvacan Police Station dagiti suspek a nakemmeg tapno dumalan iti husto a proseso.
