VIGAN CITY – Panaglabsing iti Presidential Decree 2602 wenno ti Anti-Illegal Gambling Act ti nakakemmegan dagiti tallo a babbai a nagaayam iti Bingo idiay Sitio Nadriluan, Barangay Concepcion, Cervantes.
Nabigbig dagiti suspek a da Rubylyn Fernandez, agtawen iti tallopulo ket maysa; Rowena Fernandez, agtawen iti uppat a pulo ken ni; April Bandao, agtawen iti tallopulo, agpapada a taga-Barangay Concepcion, iti nasao nga ili.
Nangiwayat dagiti kameng ti Cervantes Police Station iti anti-illegal gambling operation nga isu ti nakaduktalan nga agaayam iti bingo dagiti suspek.
Nakumpiskar ti uppat a pulo ket lima a pisos a pusta, sangagasut innem a pulo ket pito a bingo cards, pitopulo ket tallo a bingo dice ken maysa a piraso ti bingo shaker.
Agpapada a naipan iti Cervantes Police Station dagiti suspek pakairamanan dagiti naala kadakuada nga ebidensya tapno maidalan iti husto a proseso.