VIGAN CITY – Addan ti person of interest dagiti pannakabagi ti linteg nu siasino iti nangpaltog ti maysa a lalaki a gappuanan ti pannakatayna idiay Brgy. Dardarat, Tagudin.
Iti pannaki-uman ti Bombo Radyo Vigan ken ni PMaj. Darwin Julian iti Tagudin Municipal Police Station, agtultuloy iti imbestigasyonda iti pannakatay ni Dante Julio alyas Ampi, Barangay Tanod a taga-Barangay Lacong, Tagudin a nagsagaba iti dunor iti ulo kalpasan ti pannakapaltogna.
Segun ken ni Julian, naggapu idiay Farola, Tagudin ti biktima ket agawid idin iti pagtaenganda idin adda nangpaltog iti nasipnget a paset idiay Dardarat, Tagudin.
Adda laeng iti nakanggeg iti putok ti paltog a gappuanan ti panagturongda iti ayan ti biktima ket nakitada laengen a napaltogan bayat a nakalugan iti traysikel.
Iti inisyal nga imbestigasyon, awan iti basyo a naalada iti nakapasamakan ti krimen ngem patta-pattaenda a Cal. 38 iti inaramat a paltog ti saan a nabigbig a suspek.
Nupay kasta, mayur-uray iti autopsy report ti biktima ta saan a masigurado dagiti pannakabagi ti linteg nu sadino iti napuntaan a paset ti ulo ti biktima.
Kabayatanna, kiddaw ni Julian kadagiti umili a nakakita ti suspek nga ipakaammoda kadakuada tapno nadardaras a masapulan ken madusa iti inaramidna.
