VIGAN CITY – Saan pay laeng a madalanan ti Suyo-Cervantes road gapu ti napasamak a panagreggaay ti daga ken panagtinnag dagiti dakkel a batbato idiay Sitio Kiblongan, Barangay Uso ken Barangay Man-atong, iti ili ti Suyo.
Iti pannaki-uman ti Bombo Radyo Vigan ken ni PLt. Giron Ancheta iti Suyo Municipal Police Station, nagreggaay ti daga gapu ti napasamak a napigsa a gingined ken dagiti agsasaruno nga aftershock kasta payen a naigiddan ti napigsa a tudo.
Impasigurado ni Ancheta nga agpatpatnag ti panangmonitorda iti lugar kadagiti posible a mapasamak ta uray rabii ket ikagumaanda latta met a wayaan dagiti kalsada.
Kabayatanna, nakasublin iti pagtaenganda dagiti residente a nagbakwit gapu ti gingined idi napan a lawas ngem kanayonda a nakabantay kadagiti napeggad a lugar tapno mabalakadan ida nga umakar iti nataltalged a lugar.
