Nagdungsa ti driver iti SUV isu a naidungpar iti alad iti maysa a pagadalan idiay Zone 5, Bantay, Ilocos Sur idi rabii ti June 26, 2025.
Ti driver ti Toyota Innova ket lalaki, agtawen iti tallopulo ket dua, naasawaan, tubo idiay Barangay 34 Gabu Norte, Laoag City ngem agdama nga agnaed idiay Zone 5, Bantay.
Iti pannaki-uman ti Bombo Radyo Vigan ken ni PCapt. Donaldson Pagalanan a hepe iti Bantay Municipal Police Station, bayat ti panagpabagatan a direksyon ti driver iti SUV ket nagdungsa isu a saanna a napakadaan iti panagsikkona a gappuanan ti pannakaidungparna iti alad iti Bantay West Integrated School.
Segun ken ni Pagalanan, saan a naan-ano ti driver ngem nadadael iti sangwanan a paset iti lugan ken uray iti alad a nadungparna.
Nupay kasta ket impasigurado ti driver nga isun ti makaammo iti magastos para iti pagpasimpa ti nasao nga alad iti pagadalan.
Dua a lawas pay laeng manipod nasimpa iti nasao nga alad ta idi laeng May 31 ket adda manen nakadungpar.
VIDEO – PCAPT. DONALDSON PAGALANAN
Manamnama iti panangisingasing dagiti pannakabagi ti linteg iti pannakaipan ti reflectorized pavement marking ken nayon a directional sign tapno maliklikan iti disgrasia.
Impalagipna kadagiti motorista iti panagdisiplina nga agmaneho tapno saan a maisagmak.
VIDEO – PCAPT. DONALDSON PAGALANAN
