VIGAN CITY – Nagsagaba iti injury ti maysa a lalaki a nagmaneho iti motorsiklo gapu ti panagdinnungparda iti maysa nga SUV idiay Brgy Poblacion, San Esteban
Nabigbig ti nagmaneho iti motorsiko a ni Clayde Alfredo Calpito, agtawen iti duapulo ket tallo, draftsman ti Ilocos Sur 2nd District Engineering Office a taga-Tinaan, Sta. Maria.
Ti met nagmaneho iti SUV ket ni Rommel Fernandez, agtawen iti limapulo ket lima, mannalon a taga-Brgy Dan-ar, Santiago.
Agpapa-amianan ti SUV iti national highway idin ta nagsinyal nga agsikko iti akin-kannigid a direksion ket simmungad met ti motorsiklo.
Pinadas pay ti SUV a lisyan ti nakasinnabetna a motorsiklo ngem isu metten ti puon ti nagdinnungparanda.
Naipaagas iti ospital ti drayber ti motorsiklo gapu ti injury a sinagabana idinto a ti drayber ti SUV ket saan a nadangran.
