VIGAN CITY – Nagsagaba ti minor injuries dagiti pito, pakairamanan ti dua nga ubbing ken maysa a senior citizen, a naglugan ti SUV a nagatras ken natnag idiay sang-atan iti parkingan ti Xentro mall, Vigan City idi kalman, October 20.
Maibasar iti inisyal a report, sumangsang-at iti nasao a lugan a minaneho ni Edison Capistrano iti parking area ti nasao a mall idi nagsardeng ti lugan iti agsalog a paset na ket nagatras isu a nadungpar na iti kongkreto a barikada iti pagnaan a mapan iti parking area.
Ngem, segun ken ni Police Chief Master Sergeant Chester Dandin ti Vigan City Police Station, nu saan a napartak a nagatras iti lugan ket saan kuma a naburbor iti kongkreto a barikada iti nasao a mall ken mapapati a gabu iti nerbyos iti driver ket nabaddekan na iti accelerator iti lugan.
Pinasingkedan met ni Dandin a saan a nakainom iti nagmaneho iti nasao a lugan idi napasamak iti aksidente.
