Aminado ni Tingog Partylist Rep Jude Acidre a mabalin a maiyatiddog ti suspension kontra ken ni Cavite Rep Francisco “Kiko” Barzaga no adda maikadua nga ethics complaint a maipila.
Pinasingkedan ni Acidre nga agingga laeng inton umuna a lawas ti Pebrero ti suspension ni Barzaga no saan a maiyatiddog.
Impakaammo ni Acidre a nakalukat ti House Committee Ethics no adda baro a naglabsingan nga inaramid Barzaga a mabalin a basaran tapno agisayangkat ti baro nga imbestigasion wenno ma-extend ti immuna a suspension.
Ti posibilidad ti maikadua nga ethics complaint kontra ken ni Barzaga ket ti imbaga ni Deputy Speaker Ronaldo Puno, chairman ti National Unity Party (NUP) a kayat a mapatawan ti nadagdagsen a dusa ni Barzaga kangrunaan ti “expulsion”.
Daytoy ket gapu ti maipagarup nga agtultuloy a panagirruar na dagiti public statement ken social media posts-na a mapapati a libelous. Reynand Fontejon
