VIGAN CITY – Temporaryo a nawaya-wayaan ti suspek iti pammaltog a napasamak idiay Bayubay Sur, San Vicente idi June 1 iti agdama a tawen.
Iti gatad a sangapulo ket walo ribo a pisos ket nakapyansa itattay ni Julius Dela Cruz Roman, agtawen ti duapulo ket walo, naasawaan nga agnaed idiay Brgy. Bannuar, San Juan ta nakemmeg gapu iti panangpaltogna ken ni Paul Lendri Reyes Rosario, agtawen ti tallopulo, naasawaan nga agnaed idiay Brgy. San Pedro Sur, Vigan City gapu iti mapapati nga imon.
Immunan a naipila ti kaso a Frustrated Homicide ken ni Roman ngem inkeddeng nga imbaba ti pisikalya ket nagbalin nga Attempted Homicide iti maipataw ta saan a nagresulta iti fatal ti pasamak.
Nupay kasta ket agtultuloy latta iti panangtakuat dagiti pannakabagi ti linteg nu kukua ti suspek ti paltog ken manarimaan ti verification nu adda iti record a nakaaramatan idi kallabes ti nasao a paltog.
Maipalagip nga iti oras ti alas dos iti malem idi Hunyo Uno ket pinaltogan ni Roman ni Rosario ta naglidem ti panagkitana ta immunan a binato ti biktima iti kotse ti suspek a gappuanan iti panangkamat ken panangpaltogna.
Iti agdama, natalgeden ti kasasaad ti biktima ket nakaawid payen iti pagtaenganda.
