VIGAN CITY – Boluntaryo a simmuko ni Dominador Gamilo Arquero Jr., agtawen iti duapulo ket uppat, sound system operator a taga-Barangay Talogtog, Candon City a suspek iti pammagkong iti nasao a lugar.
Ti biktima ket ni Gerry Mendoza Gamata, agtawen iti limapulo, foreman ken agnaed iti Barangay Talogtog.
Agin-inom ti biktima ken ti ama ti suspek a ni Dominador Gamilo Sr. iti pagtaengan ti suspek idi dimteng ti suspek a nakiinom met kadakuada ket kabayatan ti panagpapatangda, rimsua ti saanda a pagkikinnaawatan.
Napan ti suspek iti kuartona ket innalana ti balisongna sa na ginandat a bagkongen ti biktima.
Linisyan ti biktima ngem kinamat isuna ti suspek ket binagkongna ti bukotna.
Gapu dayta, nagsagaba iti dunor iti akin-kannigid a ngato a bukot ti biktima.
Kabayatanna, ti isusuko ti suspek ket babaen ti panangkadua ti amana ken ni Barangay Captain Jayson Pascua.
Karaman met a naisuko ti patadem a nausar iti napasamak a pammagkong.
