VIGAN CITY – Kaso a homicide ti maisagsagana a sangwen ni Corazon Barnachea, agtawen iti uppat a pulo ket siam, agnaed iti Barangay Otol Patac, San Ildefonso gapu ti aksidente a pannakaiputokna iti iskupeta iti biktima a ni Johnny Tira, agtawen iti uppat a pulo ket lima a kapiduana.
Iti pannaki-uman ti Bombo Radyo Vigan ken ni PLt. Alberto Ramos Jr., aksidente ti napasamak ta idi binulod ti biktima ti iskupeta ti suspek ket bigla met nga inagaw ti biktima isu a nakalbit ti suspek.
Gapu dayta, saan a naigagara ti suspek a naiputok ti iskupeta iti tengnged ti biktima nga isu ti puon ti nakatayanna.
Innayon ni Ramos a nangrugi a naginom iti arak dagiti dua iti alas syete iti agsapa agingga iti alas onse iti agsapa nga isu ti pannakapasamak ti insidente.
Nasarakan dagiti nagresponde a kameng ti San Ildefonso Police Station ti biktima a nakaidda iti bamboo sofa a napunno iti dara.
Naipaagas pay met ti biktima iti Northside District Hospital, Guimod, Bantay ngem dead on arrival.
Segun met iti suspek, aksidente ket saanna a nagayatan ti pasamak ta nabayagen a bulbuloden ti biktima ti iskupetana gapu ta agparparikut kadagiti putotna a mangkabkabil kenkuana.
Ngem idi bitbitbiten pay laeng ti suspek ti iskupeta ket dagus nga inagaw ti biktima.
