VIGAN CITY – Sumagmamano a paset idiay Barangay Naguilian, Caoayan ket adda napintaan wenno na-vandal.
Segun kenni Barangay Captain Marlon Atinaja, adda iti nangipakaammo kenkuana a kagawad inaig iti naisurat wenno naipinta iti pader iti pagtaengan da Elena Adoc, kasta pay idiay waiting shed ti Anunang- Naguilian ken amianan a paset iti kamposanto idi naminsan ket idi napan na kinita, pudno iti naipakaammo kenkuana ngem saan a maawatan dagiti naisurat iti pader.
Saan a kayat ni Atinaja iti mangted iti patta-patta na nu siasino iti posible nga akin-aramid iti nasao a pasamak ta saan na a kayat iti agpabasol lattan.
Kabayatanna, sa laeng naamuan ni Adoc a napinta-pintaan iti pader iti pagtaengan da idi inpakaammo kenkuana ti maysa a barangay kagawad.
Binilinen ti kapitan dagiti barangay tanod da a kitaen da a naimbag iti barangay da ket inton adda iti maisayangkat a basketball tournament, masapul a mabingay to dagiti barangay tanod nga agbantay iti barangay da.
