VIGAN CITY – Pammakawan ti kangrunaan a kiddaw ti suspek iti pannagbat idiay San Mariano, Bantay a ni Bonifacio Taculod Cortez Jr., agtawen iti uppat a pulo, construction worker, agnaed iti nasao a lugar.
Ti biktima ket ni Elpidio Ortega Cortez, agtawen iti limapulo ket pito, maysa a mangngalap.
Segun iti asawa ti bktima a ni Norma Baccay Cortez, agmaymaysa nga agin-inom ti biktima iti pagtaenganda, idinto a ti suspek a kaanakan ken karrubana ket agin-inom met laeng iti uneg ti pagtaenganda ket rimsua ti saanda a nagkinnaawatan.
Kinarit ti biktima ti suspek ket pinangtaanna daytoy a patayenna.
Nairita ti suspek isu a napan iti pagtaengan ti biktima ket pinadasna a lukatan ti arwangan.
Linuktan met ti biktima ti aruangan ket rimuar ngem ti suspek a nakaiggem iti buneng ket kinamatna ti biktima a nagtaray a nagpa-abagatan.
Naalarma dagiti karrubada idi makitada ti biktima a natnag iti bassit a derraas nga addaan daytoy iti dunor gapu ti pannagbat iti bukot ken abagana.
Naitaray iti balay-pagagasan ti biktima idinto a ti suspek ket naglibas babaen ti motorsiklo nga inaramatna ngem natiliw met laengen dagiti pannakabagi ti linteg.
Kabayatanna, segun iti suspek, pagbab-babawyanna ti inaramidna agsipud ta daytoy ket ulitegna met laeng ngem kunana nga idi manen ket rimsua dagiti saanda a pagkinnaawatan gapu ti daga.
Kunana nga agpadada met laeng a nakakainom ken pudno laeng a nasuron iti panangpangta ti biktima kenkuana.
