VIGAN CITY – Balligi ti pannakakemmeg dagiti pannakabagi ti linteg ti Vigan City Police Station ken ni Jomar Alasaas Petate idiay Buguey, Cagayan kalpasan ti sangapulo ket dua a tawen a panaglemlemmengna gapu ti kasona a murder.
Ni Petate ket suspek iti panangtagtagbat ken panangikalina iti live-in partner na idi 2012 iti ili ti Santa.
Iti pannaki-uman ti Bombo Radyo ken PLt. Col. Reynante Pitpitan, babaen ti intelligence gathering dagiti tracker team-da ken pannakikinnammayetda iti Buguey Police Station ket nabirukanda ti suspek.
Pagyamanan met dagiti pannakabagi ti linteg agsipud ta numan pay nagsukat ti naganen ti suspek ket naikagumaanda latta a matiliw.
Iti agdama, awan pay la ti nagbalin a statement ti suspek nga itan ket adda sabalin a pamiliana idiay siudad ti Tuguegarao.
