VIGAN CITY – Naipilan iti kaso a robbery kontra ti agtawen iti sangapulo ket walo a suspek iti panagtakawan iti uneg ti pagtaengan ni Domingo Ped Rayray idiay Barangay Nambaran, Sto. Domingo idi June 4.
Segun ken ni Police Captain Christopher Ramat Sr., hepe ti Sto. Domingo municipal police station, adda dagiti ebidensiya a naala da tapnu maitalmeg iti nasao a kaso ti suspek a kabagyan met laeng ti biktima.
Maipalagip a ti nasao a panagtakawan, napukaw iti sangapulo ket tallo ribo a dolyar ti biktima a nakaikabil iti safety vault iti uneg iti maysa kadagiti kwarto iti pagtaengan na.
Naamuan a ti tinakaw ti suspek a kwarta ket ingatang na iti Nmax motorcycle ken accessories iti nasao a motorsiklo idinto a dagiti dadduma ket posible a naigastos nan.
