VIGAN CITY – Pammakawan ti kangrunaan a kiddaw ni Leo Cabusao, agtawen iti duapulo ket lima, taga-Sitio Cacaldingan, Barangay Lungog, Narvacan iti pamilia ti barkadana nga aksidente a napaltuganna idi aldaw ti Huebes Santo idiay Barangay Paras, Sto. Domingo.
Ti biktima ket ni Rizen de Guzman, agtawen iti duapulo ket walo, taga-Barangay Paras, Sto. Domingo.
Iti pannakipatpatang ti Bombo Radyo Vigan ken ni Cabusao, gapu iti dandanagnan no apay a naibellengna ti paltog ken nagdardaras a naglibas ta intarayna pay ti lugan a nakitana nga adda tulbekna a napan kimmamang iti ulitegna.
Kalpasan dagita pasamak, simmuko met laeng ti suspek kadagiti pannakabagi ti linteg.
Maipalagip nga agin-indayon ti biktima kabayatan ti panagpinnatangda ti suspek mainaig iti paltog idin ta innala ti kabsat ti biktima ngem idi insublina daytoy iti suspek, kinalbitna ti paltog iti pababa a direksyon ket naipunta iti ulo ti biktima.
Mapapati a caliber 22 ti inaramat ti suspek iti pammaltog.
Kabayatanna, pinasingkedan met ti ina ti biktima a kritikal pay laeng ti kasasaad ti anakna iti ospital ken parikutda ti pinansial a pangsupusopda kadagiti mabayadan ta umab-aboten daytoy iti nakurang uppat a gasut a ribo a pisos.
Arigna saan met a kumbinsido ti ina a saan a naigagara ti pannakapaltog ti anakna ta ti suspek met laeng ti nangibaga nga iputokna idin ti paltog.
Ngem nupay kasta, kayatna a makapatang ti suspek no apay a naaramidna dayta iti anakna.
