Simmukon kadagiti pannakabagi ti linteg ni Maynard Unciano Torreno Jr., agtawen iti tallopulo ket tallo, taga-Barangay Patong, Magsingal, Ilocos Sur a suspek iti pammaltog iti nasao a lugar.
Ti biktima ket ti kasinsinna a ni Edmond Unciano Ronquillo, agtawen iti uppat a pulo ket tallo, taga-Sitio Centro, Barangay Patong iti nasao nga ili.
Ti panangpapatay ti suspek iti kasinsinna ket gapu ti atapna a ti biktima ti nangibuksilan kadagiti pannakabagi ti linteg ti iligal nga aramidna idi 2022, a rason no apay a naipakatan iti search warrant operation.
Maipalagip a mapan iti babuyanna ti biktima nga agpakan kadagiti tarakenna a baboy idin ta dimteng ti suspek iti likudanna a nangpaltog iti nadumaduma a paset ti bagina.
Narekobre ti sangapulo a fired cartridges ti caliber 5.56 iti nakapasamakan ti krimen, shotgun, ken maysa nga M16 rifle.
