VIGAN CITY – Kaso a murder ken panaglabsing iti Comelec gun ban ti maipila ken ni Ian Carta, agtawen iti tallopulo a taga-Barangay Pagburnayan, Vigan City gapu iti panangpaltogna ken ni Michael Angelo Valoroso, agtawen iti tallopulo ket dua a taga-Barangay Anonang Menor, Caoayan.
Iti pannaki-uman ti Bombo Radyo Vigan ken ni PMaj. Pol Arreola, simmangpet ti biktima ken ti live-in partner-na nga agtawen iti duapulo ket walo a taga-Barangay Labut, Magsingal iti pagab-abanganda a transient house a kukua ni Hubert De Gracia idiay Govantes Dike, Barangay 5, Bantay ket sinurot met ti suspek.
Rimsua ti saan a nagkinnaawatan ti suspek ken ti biktima agingga idi makangngeg ti akin-kukua iti transient house iti tallo a putok iti paltog iti nakasarakan ti biktima a nakadasay iti kwarto.
Dead on the spot ti biktima gapu iti tama ti paltog ti rupa ken bakrangna ken naala iti nakapasamakan ti krimen ti tallo a spent shell ti caliber 9mm ken maysa a fired bullet.
Makita met iti CCTV footage a nagkalugan met laeng ti agassawa ngem nakemmeg ti suspek babaen iti follow up operation.
Agtultuloy ti panangimbestigar dagiti pannakabagi ti linteg no ania ti motibo iti pammaltog.
