Nakemmegen ti suspek iti pammaltog a napasamak idiay Arellano Street, Zone 6, Bangued, Abra idi kalman (Mayo 3) iti alas onse y media iti bigat babaen ti napaspas a panagresponde ti nagtipon a puersa ti Provincial Intelligence Unit operatives, Bangued Municipal Police Station ken alert team.
Maibasar iti naisayangkat nga imbestigasyon, ti biktima a nakainom ket simmangpet iti pagtaenganda ken kalpasan iti pannanganna, napan iti likudan ti pagtaenganda.
Iti dayta a gundaway, binugkawan ti suspek ken ti karrubana a kaduana nga umin-inom ti biktima isu a simmangat met daytoy a nangitunda iti nabara a patangan ken panagdinnanogda idi makastrekda iti pagtaengan ti biktima.
Kabayatan iti panaggubalda, nangngeg ti putok ti paltog ket natamaan ti tyan ti biktima.
Naipaagas iti ospital ti biktima para iti pannakatamingna ket dagus met a nakemmeg ti suspek.
Narekobre ti caliber 22 a paltog a nausar nga adda dua a balana, ken ti dua a fired empty shell ti isu met laeng a kalibre ti paltog.
Addan iti kustodia ti Bangued Municipal Police Station ti suspek a sumango ti frustrated homicide.
