VIGAN CITY – Naiserbin ti warrant of arrest ni Allyson Regpala, agtawen iti duapulo ket siam ken ni Joseph Ranada, agtawen iti innem a pulo, agpada a karpentero a taga-Barangay Teppeng, Sinait kalpasan ti pannakakemmegda idiay San Ildefonso, Bulacan.
Babaen ti nagtinnulong a pwersa ti Sinait Municipal Police Station, San Ildefonso Municipal Police Station idiay Bulacan, ISPIU, Cabugao Municipal Police Station ket ti 1st ISPMFC ket naiserbi ti warrant of arrest para iti kaso a murder nga imparuar ti RTC Branch 24, Cabugao, napetsaan iti November 17, 2021 ken awan ti nailatang a pyansa tapno mawaya-wayaanda.
Ni Regpala ken ni Ranada ti suspek iti pammaltog kadagiti agama idi November 18, 2019 idiay Barangay Jordan, Sinait a da Edward Inofinada, agtawen iti tallopulo ket pito ken ti amana a ni Calingayan, Sinait Barangay Chairman Leonardo Inofinada nga agtawen iti innem a pulo.
Maipalagip a nakalugan idi iti traysikel dagiti agama idi pinaltugan dagiti suspek a naglibas kalpasan ti pammaltog.
Dead on arrival ni Edward gapu iti tama ti paltog ti ulo ken barukongna idinto a ti amana a nagtalinaed iti ospital para ti pannakatamingna koma ket pimmusay met laeng gapu iti tama ti paltog iti luppo ken takyagna.
