VIGAN CITY – Saanen a mapilaan ti kaso ti suspek iti pammagkong idiay Calle V delos Reyes St Brgy IX, Vigan City ta pagpatanganda laengen a dua iti biktima ti napasamak agsipud ta isuda ket nasinged nga aggayyem.
Ti suspek ket nabigbig a ni Restituto Yago, agtawen ti innem a pulo ket siam, agnaed iti nasao a lugar kabayatan nga iti biktima ket ni Rommel Baptista, agtawen ti uppat a pulo ket maysa, aglaklako ti taho a taga-Brgy. Banglayan, Narvacan ngem agdama nga agnanaed iti Brgy. IX, Vigan City.
Agin-inom dagiti dua iti maysa a naabandona a pagtaengan idin ta agkankanta ti suspek ket naririan ti biktima isu a bimmansag.
Gapu iti dayta, nangala iti bote ti arak ti suspek nga impittakna iti rupa ti biktima sa nangpidut pay iti bubog a pinangbagkongna iti tyan ti biktima ken nagsagabaanna iti dunor.
