VIGAN CITY – Kaso a murder ti sangwen ni John Mark Pacpaco, agtawen iti duapulo ket siam, tricycle driver, taga-Sagpat, Bantay gapu ti panangbagkongna ken ni Pedro Pilot, agtawen iti tallopulo ket siam, construction worker nga agnaed met laeng iti nasao a lugar.
Napasamak ti pammagkong iti basketball court ti barangay, a ti biktima ket nagsagrap iti adu a dunor ti nadumaduma a paset ti bagina ken naitaray iti ospital ngem naideklarar a dead on arrival.
Iti pannaki-uman ti Bombo Radyo Vigan ken ni Police Major Pol Areola, nadakamat kadakuada ti witness a ni Joselito Pablo, agtawen iti tallopulo ket tallo nga agnaed met laeng iti nasao a lugar nga adda saan a nagkinnaawatan ti suspek ken biktima kalpasan ti panagiinomda.
Innayonna nga awan met ti napasamak nga argumento kabayatan ti panagiinomda ngem kalpasan ti sumagmamano a minutos, nagawid ti witness idin ta nakaawat iti tawag manipud iti kasinsin ti suspek a ni Anthony Pacpaco nga agpatpatulong tapno anawaen ti suspek nga agprobprobokar iti basketball court.
Idi mapanda anawaen kadua ti kasinsin ken ti ina ti suspek, isu met ti gundaway a panangbagkongna iti biktima iti namin-adu a daras.
Sakbay ti pasamak, napan pay nagprobokar ti suspek iti pagtaengan ti biktima usar ti traysikelna nga isu met ti gundaway a naaddaanda iti saan a panagkinnaawatan.
Insigida a nangisayangkat iti hot pursuit operation dagiti pannakabagi ti linteg ket nakemmeg ti suspek iti family house-da.
Agtultuloy ti imbestigasyon ti Bantay Police Station para iti pannakatakuat no ania ti naun-uneg a motibo iti napasamak.
